O vindeiro domingo 26 de febreiro terá lugar a primeira asemblea do ano, onde se presentarán importantes novidades e debatiremos sobre a liña a seguir neste 2012.

Estades todos convidados!

Pablo Novoa é un deses músicos inquietos, polifacéticos, imaxinativos e, pola súa traxectoria, un indispensable do que sempre poderás tomar boa nota.

¿Como empezaches na música e cales foron as túas primeiras influencias musicais?

Empecei co meu irmán maior. El traía a casa os discos dos Beatles, Shadows, Rolling, Jobim e aprendeume os primeiros acordes. Temén fixábame moito na música das películas que vía no cine e na tele.

Nos últimos tempos tes colaborado con numerosos artistas de renome, ¿en que proxectos andas agora metido?¿Algún traballo en solitario á vista?

Estamos empezando coa nova xira de Iván Ferreiro e de Bebe. Sigo con Mastretta e de cando en vez fago concertos con Josele Santiago. Espero sacar este novo ano a banda sonora que compuxen para unha película e facer algúns concertos con esta música máis algunhas cancións do meu primeiro CD. Se teño tempo, gravarei o meu segundo disco que teño xa preparado.

Tras máis de vinte e cinco anos de carreira, ¿como inflúe esta longa experiencia á hora de abordar novos camiños e proxectos?

A experiencia sérveme para ter máis referencias, para ver máis globalmente a música. Para limpar a palla e buscar a emoción e evitar os manierismos.Tamén para mergullarme con máis intensidade no mundo de cada artista con quen traballo.

Ti que viviches de primeira man o éxito nos 80´s con Golpes Bajos, ¿de que xeito te marcou a música da movida no teu estilo actual?

Musicalmente penso que deixou máis pegada o que escoitaba de pequeno que ningunha outra música, pero certamente, os 80´s foron a época na que me formei como músico e me fixen profesional.

¿Como ves a situación da música actual en Galicia con respecto ao que coñeces do resto de estado?

Non teño tantas referencias como para comparar con tino, pero Galicia sempre tivo unha importante tradición musical ( como Valencia e as grandes cidades), gracias ás bandas de música, ás orquestas e aos grupos que manteñen o folklore. E penso que iso segue ocorrendo aínda que non teña un reflexo claro no éxito comercial. Ben, xa sabemos que o éxito e a cultura non adoitan ir da man!

¿Que che parece que exista un colectivo asociativo de músicos galegos de carácter xeral?

Fundamental. Tal e como vai o país, a única forza que podemos ter é estando unidos. Nos permite pasarnos información, loitar por cousas tan básicas como a Seguridade Social, etc… e poder ter voz en asociacións de todo o Estado.

¿Que papel cres que debe desempeñar a administración pública na música e nas industrias culturais en xeral?

Para empezar non deben ser impedimento para o desenvolvemento das actividades culturais, ao revés, deben coidar a iniciativa e a imaxinación. Refírome a iso que moitos coñecemos: empezar un proxecto con ” menos cincocentos euros”. Sempre hai que comezar pagando e non debe ser así.

Tamén e importante que as institucións apoien a cultura. A cultura, a educación e a sanidade son o verdadeiro futuro dun país. Pero a axuda ten que seguir uns criterios moi estritos de valor cultural e diversificación.

O valor cultural aínda que subxectivo, debe estar nas mans de xente do mundo da cultura, non de políticos ou economistas. E cando falo de diversificación, quero dicir que hai que repartir; ningún artista podería obter máis dunha axuda. De todos os xeitos non é un asunto doado.

TEST

- Ensinanza regrada ou autodidacta

As dúas son necesarias. A ensinanza regrada da uns coñecementos fundamentais para manexarse en música, pero penso que a verdadeira personalidade dun músico é cousa del e o seu entorno máis cercano.

- Estudar música só ou en grupo

Tamén os dous. Moita  aprendizaxe depende do esforzo persoal e da reflexión de cada un, pero normalmente, a música faise en grupo e é necesario escoitar ós demais. Eu aprendín a maior parte das cousas fixándome en outros músicos.

- Recomenda un libro sobre música

Fóronme  moi útiles as biografias de Nino Rota e Bernstein. Non aprendes harmonía,  pero entendes moito mellor o que é a Arte da Música. En maiúsculas.

- Recomenda un disco de sempre e outro actual

Non e moi orixinal, pero escoitade a Cantata 147 ou o terceiro concerto de Brandeburgo de Bach.

Da música do século XXI, eu fixaríame en Tom Waits, na Orquesta Andalusi de Marrocos, en Eels, en Caetano Veloso, en Ry Cooder, en Femi Kuti, en Nono García… uf! Moitos máis.

- ¿Con quen che gustaría ter tocado?

Con Stravinsky, pero non cheguei a tempo, e ademáis, ¿que necesidade tiña él de tocar conmigo?. É o pai da música moderna. Tanto no jazz como na música clásica. A música popular depende dos pobos e non creo que se deba nomear ningún músico en particular.

Unha sentenza do Supremo deixa sen a denominación de grao aos estudos superiores de ensinos artísticos en España. O fallo afecta a 17.000 alumnos de cinco especialidades, entre elas a música, que agora quedan en inferioridade de condicións con respecto aos seus colegas europeos.

A sentenza tomba parte do decreto que fai dous anos adaptou os ensinos artísticos superiores ao marco de Bolonia, outorgando o título de grao aos estudos de Música, Danza, Arte Dramática, Deseño e Artes Plásticas ou Conservación e Restauración de Bens Culturais.

Fontes e máis información:

Cadena Ser

Hispasonic

Oysiao en el oasis / 2

Interesante artigo aparecido en Culturagalega.org sobre este modelo de financiamento.

Do 23 ao 26 de maio volverá unha nopva edición do Festival de Cans.

No caso do concurso de videoclips, búscanse pezas entre os anos 2010 e 2012 de grupos ou artistas galegos ou dirixidas por galeg@s. Consultade as bases aquí.

¿Os premios? O primeiro, entrar na selección do festival. E se a cousa vai ben, podedes facervos con algún dos galardóns. Dentro da sección de videoclips atopamos mellor videoclip segundo o xurado e mellor videoclip segundo o público. Cada un deles premiados con 300€ e un Can de Pedra.

O acto terá lugar este sábado 17 de decembro ás 18:00h no local de música de Pontevedra (Rúa Otero Pedrayo, s/n. 36004 Pontevedra), e será unha conferencia aberta e polo tanto poderán achegarse quen queira ou quen estea interesado.

O Local de Música de Pontevedra é un espazo público concebido para que os músicos e grupos noveis do Concello de Pontevedra teñan un punto de encontro onde poder realizar actividades de ensaio, gravación, formación, etc, que está xestionado por Xeneme.

Blog do Local de Música de Pontevedra

A nova completa en La Voz de Galicia.

Músicos ao Vivo estará presente nesta edición do Culturgal por medio dun stand no “Patio” (stand p24).

Ademáis a asociación dará unha charla aberta ao público e especialmente dirixida a músicos e contratadores que falará sobre a contratación de músicos en espectáculos públicos, o status legal do músico e o sistema de cooperativas de músicos. A charla terá lugar o sábado 3 de decembro ás 12:00h no espazo “Obradoiro”.

Esperámosvos alí!

Os vindeiros 2, 3 e 4 de decembro terá lugar unha nova edición da Feira das Industrias Culturais (CULTURGAL) no Pazo da Cultura de Pontevedra.

Culturgal é o fogar da cultura galega. Unha gran casa construída entre os distintos gremios da cultura: libro, creación audiovisual, artes escénicas, música, deseño, internet e novas tecnoloxías. Un fogar coas portas e ventás abertas sempre cara á sociedade.

Culturgal celebra un evento anual que conxuga o encontro profesional coa presentación, promoción e venda aberta ao público de produtos e servizos. Para facelo, válese de dúas patas fundamentais: a Feira e o Foro. A Feira das Industrias Culturais de Galicia achega ao público ás novidades editoriais, o último en música, o glamour do audiovisual, a maxia das artes escénicas, os avances das novas tecnoloxías e mesmo as propostas máis marxinais en tres días de actividade sen tregua para os públicos máis variados. O Foro Culturgal, pola súa banda, é un lugar de encontro privilexiado para os axentes do sector, un espazo para a reflexión e a aprendizaxe, no que intercambiar experiencias e imaxinar novos proxectos baseados na colaboración e no apoio mutuo.

Tendes a programación completa na web do Culturgal ou no folleto da Feira.

O vindeiro sábado 26 de novembro, Músicos ao Vivo dará unha charla para todos os músicos do Val Miñor.

A actividade realizarase na Taberna Marrucho, a partir das 19:00h e está organizada polo colectivo Berra!.

Como fin de festa musical realizarase unha jam session aberta a partires das 22:00h.

Vémonos alí!

O vindeiro luns, 14 de novembro, terán lugar unha serie de de asembleas abertas por todo o territorio estatal coordinadas pola rede de salas. O obxectivo é debater e definir o lugar que deben ocupar as artes escénicas no entorno actual. Tentarase facer unha conexión estre todas as asembleas vía Internet.

En Galicia, o evento terá lugar no Teatro Ensalle de Vigo, ás 18:00 horas.

Moita xente pertencente ao colectivo de músicos pensa que o que corre perigo para 2012 son as institucións autonómicas (AGADIC) e as estatais (INAEM), e ambas teñen que ver con artes escénicas pero tamén, e en gran medida, coa música. Entendemos, pois, que é de vital importancia dar difusión entre colectivos de músicos e músicos individuais para que asista á reunión o maior número de xente. Así, a música terá voz nas conclusións finais que se lle presentarán aos políticos dende esta plataforma.

O diario “El País” faise eco das reclamacións de diferentes asociacións de Galicia polos impagos da Administración co sector musical e de outras actividades artísticas.

A nova completa aquí.

Entre as accións de protesta, esta mesma mañá a Asociación de actores e actrices de Galicia estase a manifestar diante da sede de AGADIC para reclamar o pago das cuantías adebedadas.

O contrabaixista galego Baldo Martínez é un dos músicos máis representativos do jazz contemporáneo feito en Galicia e en España, afastado das correntes do Jazz americano e moi na liña do Jazz europeo actual alterna a súa actividade musical entre o Jazz e a música libre improvisada.

¿Como empezaches na música?

Se imos ao principio principio de todo, foi alá polos anos 70 tocando música de grupos como Led Zeppelin ou Deep Purple, ainda que daquela non tiña nin siquera baixo, soio o tiña para os concertos, que se facían en colexios e alguns festivais organizados de xeito “artesanal” en Ferrol, eu tiña 15 anos. Pero foi uns anos despois cando me metin mais a fondo, a principio dos 80 cando empezei a introducirme no Jazz, á miña volta de Barcelona onde iniciei os meus estudios de música no conservatorio.

¿En que proxectos musicais andas inmerso actualmente?

Acaba de sair o disco de MBM Trío xunto a Lucía Martínez e  Antonio Bravo,  e como é lóxico é uns dos proxectos prioritarios na actualidade, xunto con Triez, Sons-Nús e o Projecto Miño, istes podense decir que son nos que estou mais inmerso pero tamén están o meu quinteto e o Cuarteto Acústico…….e algunhas colaboracións.

¿Cales cres que son os camiños que está a tomar o jazz actual?

Uf! Na actualidade o Jazz esta nunha época de madurez na que hai moitos camiños a seguir e non paran de surdir outros novos. Penso que ista e unha etapa moi activa e donde aparece o mais interesante, dende o meu punto de vista, e nas pontes Europa-America, sendo a primeira donde se estan a facer os proxectos mais interesantes, buscando cada un a súa entidade, aportando cada vez máis cousas de outras músicas, como sempre foi nesta música que se alimenta de todas as fontes que atopa de interés.

¿Como ves a situación da música actual en Galicia? ¿E concretamente do jazz galego?

Dende o punto de vista creativo e artistico penso que no caso concreto do Jazz  estase a pasar por unha etapa de explosión de músicos moi ben preparados, con moitas ideas e que as plasman en proxectos moi interesantes e personais. Ten tamén moi boa acollida fóra de Galicia,  tense moito interés polo que esta acontecendo aquí. Por outra banda necesítase un maior apoio institucional, si que o hai dende os clubes xa que hai bastantes en todo o país onde de maneira regular se programa Jazz, aínda que sempre pode haber máis,  é unha moi boa maneira de que os músicos estean activos, pero, como dicía, as institucións aínda ven o Jazz como unha música que ven de fóra e non como unha música universal que se vive de xeito distinto dende cada país, é unha moi boa seña de identidade e iso é o que teñen que asumir as institucións.

¿Que lle dirías a un rapaz que se quere adicar profesionalmente á música?

Difícil, cada persoa é un mundo. Se quere adicarse profesionalmente e porque xa ten coñecementos e experimentou algo, senon e así primeiro que se empape de moita música, tanto escoitando como estudando con bos profesores e tocando, e aprendendo dos mestres, e despois, cando o teña claro, que pense que é un camiño onde ademais de iso, o de buscarse a vida en todos os sentidos é vital, senón pódeste converter nunha mera máquina de facer notas, sobre todo senón buscas a túa personalidade como músico.

¿Que che parece que exista un colectivo asociativo de músicos galegos de carácter xeral?

Un gran logro, e que se manteña dende hai anos como é o caso de Músicos ao Vivo. Algo moi necesario non só para resolver problemas que ten o colectivo a nivel laboral, senón para ter unha voz que fale por todos ben alto e claro.

¿Que papel cres que debe desempeñar a administración pública na música e nas industrias culturais en xeral?

Debería tomar un papel de seguimento e apoio a todos os traballadores da música, en primeiro lugar aos propios músicos,  sen eles a música non existiría e o resto da industria que xorde ao redor non tería sentido. Por iso penso que en vez de tomar tantas iniciativas dende arriba, dende o poder, os políticos e xestores destas institucións deben baixar á terra e preguntarlle aos músicos directamente que é o que esta acontecendo e cales son as necesidades para iste amplio colectivo. Eles, os políticos e os cargos que eles poñen, estan durante catro anos, despois cambian pero nós, os músicos permanecemos durante anos, durante toda a nosa vida profesional neste sector e penso que somos os que mellor podemos saber cal é a verdadeira problemática e cales son as nosas necesidades. Eles, os políticos, é normal que non estean tan ao tanto do que esta acontecendo, son soamente 4 anos, ou ao sumo 8.

TEST RÁPIDO

- Ensinanza reglada ou autodidacta Sobre todo autodidacta pero tamén parte ensinanza regrada.

- Estudar música só ou en grupo A unha compleméntase coa outra, as dúas son fundamentais.

- Recomenda un libro sobre música “Tratado de armonía” de Schonberg, fundamental para calquera músico.

- Recomenda un disco de sempre e outro actual Polo que para min supoñeron vou decir dous de sempre, “Album” de Bill Evans e “Heavy Weather” de Weather Report. E como disco actual tal vez “Liberte surveillee” de Daniel Humair.

- Con quen che gustaría ter tocado? Si paro a pensar, son moitos. Pensando no pasado Bill Evans, para calquera músico e un gran mestre pero para os contrabaixistas foi unha gran escola. E pensando en músicos vivos, gostaríame compartir sección con baterías como Jack Dejohnette e Daniel Humair.  Tamén por suposto o gran mestre Ornett Coleman, Ellery Eskelin, Nils wogran …….o dito: son moitos.

Baldo Martínez é socio de Músicos ao Vivo.

Fotografía de Javier Albertos

O evento dividirease en dúas partes tratando os seguintes temas:

* Primeira parte:
- Desglose e desmitificación da armonía Pop-Rock.
- Tríadas maiores, menores, aumentadas e diminuidas: uso común e enbelecemento en Funk-Blues.

* Segunda parte:
- Escala “orixinal do Blues”
- Desglose da escala “orixinal do Blues”: Cells, acordes (“sweep“).
- Construcción de Riffs e Ostinatos.
- Cómo practicar para obter os mellores resultados: sistemas e técnicas.

Info sobre Marcos Pin na súa páxina web.

A master class terá lugar na Sala O Túnel do Coliséum, ás 11.00 h., e coma sempre é de balde. Só tedes que vos inscribir seguindo estes pasos.

Músicos ao Vivo celebrará a derradeira asemblea do ano o vindeiro domingo, 23 de outubro, na sala circular do Auditorio de Galicia (Santiago de Compostela). O evento terá lugar ás 17h.

Na asemblea falaremos de todas as novidades na marcha da asociación, que son moitas e de bastante calado; das que vos iremos informando chegado o momento.

Trataremos, tamén, cuestións de especial importancia para a marcha da asociación: orzamento previsto para 2012, situación económica actual da asociación, actividades e obradoiros previstos…Debatiremos sobre a liña de actuación a seguir e escoitaremos as inquedanzas dos músicos.

A asemblea está aberta a socios e a músicos en xeral.

¡Contamos coa vosa asistencia!

Reportaxe de EL PAÍS sobre o jazz en Galicia.

O documento completo aquí.

A banda de indie-folk Uniform Motion compartiu cos seus fans un interesante estudo dos ingresos que conseguen a través das plataformas de música dixital, comparados coa venda directa. Os resultados chaman a atención.

Spotify
Con Spotify, Uniform Motion (referirémonos a eles xenéricamente como “o artista”, aínda que falamos dun caso concreto) gaña 0.003 euros por cada reprodución.

Se escoitas o álbum enteiro todo seguido, o artista recibe 0.029 euros
Se escoitas o album 100 veces, o artista gaña 0.29 euros
Se escoitas o álbum mil veces (¡unha vez ao día durante tres anos!), o artista leva 29.47 euros
Se usas a versión gratuíta de Spotify, evidentemente non che custará nada, xa que Spotify consegue o diñeiro pola publicidade. Pero en canto ás versións de pago, o artista non sabe nada das contas. Só ofrecen esa información ás grandes discográficas.

Deezer (un servizo similar a Spotify, que funciona en Reinuo Unido e Francia)
Neste caso, o artista obtén 0.006 euros por reprodución, ou 0.052 euros por reprodución de álbum completo. Se escoitas o álbum dez veces, o artista leva 0.52 euros. Se o escoitas cen veces, 5.2 euros. E mil veces, 52 euros.

Do mesmo xeito que Spotify, non se coñecen as contas de Deezer en canto ás versións de pago.
eMusic
eMusic é un servic¡ou por subscrición; o custo do álbum dependerá do plan que teñas. De media, Uniform Motion obtén 0.29 dólares por canción ou 2.60 dólares por álbum (de 9 cancións).
Amazon MP3
Pagas 7.11 euros por baixarche os MP3s; o artista leva 4.97 euros (unha relación de 70 a 30%).
iTunes
O álbum cústache 8.91 euros en iTunes; hai unha relación de 70-30% tamén, así que o artista leva 6.28 euros desa cantidade.
Hai que ter en conta que ao artista cústalle 35 euros ao ano manter un álbum en iTunes, Spotify e Amazon. No caso de Uniform Motion, que ofrece tres álbums, non conseguen ningún diñeiro ata que polo menos 24 persoas compren unha copia dixital do álbum en iTunes, ou 150 cancións soltas, ou ata que reciben decenas de miles de escoitas en Spotify.

Segundo din os compoñentes de Uniform Motion, “así é máis viable non vender música”.

En comparación coas plataformas de venda de música dixital, Uniform Motion tamén ofrece un desglose do que gañan coa venda directa, sen intermediarios.
Dixital
Uniform Motion permite que os seus seguidores paguen o que queiran pola versión dixital das súas álbums. Se por exemplo, un comprador paga 5 euros, Paypal leva 0,37 euros, e Bandcamp 0,75. O artista retén 3,88 euros (non custa nada ter conta en Bandcamp).

Segundo din, “se decides non pagar nada, non obtemos nada, pero polo menos non lle dás diñeiro indirectamente ás grandes discográficas, como no caso de Spotify”.

CD
Se compras un CD directamente a Uniform Motion, por 10 euros, Paypal leva 0,515 euros e Bandcamp 1,5 euros. Quedan algo menos de 8 euros para eles.

Aínda que facer o CD ten o seu custo: 1,2 euros polo CD, 50 céntimos polo booklet e 1,8 euros por empaquetalo, ademais de 35 céntimos polo adhesivo frontal. Iso fai un total de 3,65 euros, así que en realidade quedan 4,34 euros dos 10 iniciais para o artista.

Vinilo
Se lles compras un vinilo de 12″ por 15 euros, Bandcamp queda 2,25 euros e Paypal 0,646 euros, así que quedan 12.10 euros. O custo do vinilo en si mesmo é de 3.06 euros; xa que logo, quedan 4,36 euros para o artista.

Con todo, como piden tiradas de 250 vinilos, deben vender polo menos 72 copias para equilibrar ingresos e gastos.
Visto en Hispasonic e no Tumblr de Uniform Motion.

A Consellería de Cultura e Turismo presentou a pasada semana no Consello da Xunta o informe ‘As industrias culturais e creativas galegas: presente e futuro’, no que se propoñen dez liñas de actuación destinadas a favorecer a dinamización e competitividade do sector cultural galego a nivel económico e empresarial.

Elaborado pola Axencia Galega das Industrias Culturais (Agadic), o documento baséase na potencialidade das empresas culturais galegas como xeradoras de emprego e riqueza para identificar medidas concretas nos ámbitos do emprego, o emprendemento e a promoción empresarial, a formación, a xestión de fondos europeos, a internacionalización, o emprego de novos instrumentos como a co-creation e o crowdfunding, a agrupación de clústeres ou o incremento inversor e a visibilidade social.

Partindo das conclusión tiradas do estudo de 2010, As cifras da industria cultural galega: análise cuantitativa, segundo o que este sector emprega a máis de 17.500 persoas e factura anualmente por riba dos 1.100 millóns de euros, establécense agora unha serie de obxectivos a curto prazo, entre os que destacan a promoción do emprego xuvenil e a absorción de masa laboral procedente doutros sectores.

Asociacionismo

As medidas propostas esténdense tamén ao asociacionismo profesional, no sentido de impulsar a posta en marcha dun único clúster galego das industrias culturais e creativas, que agrupe os distintos clústeres e asociacións que conviven actualmente no sector cultural (produto gráfico, libro, audiovisual, música, escena, servizos para eventos, etc.) e se converta en interlocutor principal ante a Administración pública.

A optimización dos recursos económicos a favor dun investimento orientado fundamentalmente á xeración de emprego, ao mantemento do mesmo e á consolidación deste tecido industrial, así como o impulso da visibilidade social do sector cultural como motor económico, completan este programa de propostas, a través do que se aposta pola a calidade, a creatividade, o turismo e o patrimonio como eixos económicos de futuro.

Ensaio do patrocinio como figura para apoiar a creación galega

“Primeiro existía unha fórmula que eran os convenios, despois chegaron as subvencións e agora pareceunos interesante experimentar se podería funcionar unha vía como o patrocinio no que as compañías tamén arriscan co espectáculo”. Así se explicou esta semana Juan Carlos Fasero, director de Agadic, na presentación de “O florido pénsil” (Produtora Emedous), primeira montaxe que se presenta baixo esta fórmula. Agadic achegou 25.000 euros, así como a cesión do Salón Teatro onde se estreou o espectáculo que estará de xira pola Rede Galega de Teatros e Auditorios ata mediados de decembro. “É unha fórmula que pretendemos aplicar a determinados proxectos se esta experiencia resulta positiva” matizou o director de Agadic.

Fontes:

AGADIC

CULTURAGALEGA.ORG

(Enlace a Youtube)

A axencia SimplyZesty elaborou un vídeo repleto de cifras e datos curiosos, que ofrecen unha interesante perspectiva do moito que cambiou o negocio da música. Da para pensar sobre moitas cousa…

Frases do vídeo traducidas ao galego:

- Asistir ao primeiro Festival de Glastonbury en 1970 custaba 1 libra (incluíndo unha botella de leite de agasallo).
- Billy Jean, de Michael Jackson, foi o primeiro vídeo dun artista negro na MTV.
- A guitarra máis cara xamais vendida foi unha Fender Stratocaster asinada (2.7 millóns de dólares).
- Mentres Napster estaba funcionando ilegalmente (1998-2001), as vendas de CDs aumentaron en máis de 500 millóns de dólares.
- En 2002, antes de que chegasen as descargas dixitais, vendíanse 43 millóns de singles en CD no Reino Unido. En 2009 foron 1,9 millóns, pero tamén se venderon máis de 119 millóns de descargas.
- O 95% de todas as descargas de música son “ilegais”.
- De cada 20 bandas que asinan contrato, só 1 venderá máis de 1.000 discos.
- Catro compañías venden o 70% da música do mundo (Warner, Sony, EMI e Universal).
- Warner pagou 28 millóns por obter os dereitos da canción “Cumpreanos feliz”.
- Gibson fabrica 1.380.000 guitarras ao ano (unha por segundo).
- Fabrícanse 2.400 millóns de CDs ao ano. A metade son CDs virxes.
- A venda de vinilos incrementouse nun 41% (período 2010-2011).
- Dr. Dre vendeu o 51% da súa empresa de auriculares “Beats” por 300 millóns de dólares.
- Spotify fai máis diñeiro en Suecia que iTunes.
- Nun mes, Turntable.fm gañou 300.000 novos usuarios. Agora ten unha valoración de 37.5 millóns de dólares.
- Facebook lanzará este mes unha plataforma de música. O ano que vén alcanzará os 1000 millóns de usuarios.

Visto en Hispasonic

A SGAE, tralos continuos escándalos protagonizados dende verán por varios ex-dirixentes, parece que comeza a tomar medidas para encauzar o cambio que tanto se leva esixindo dende moitos sectores autorais. En asemblea celebrada o pasado día 20, puido comezar a por as bases dun sistema electoral máis participativo e transparente.

Os socios elixiron aos quince membros que integrarán a Comisión encargada da reforma do proceso de elección. A actual comisión reitora (o órgano provisional que toma decisións) levou unha lista con 15 nomes de consenso que representaban ás faccións enfrontadas.

Á asemblea asistiron máis de 500 socios con dereito a voto (poden facelo 8.000 dos 100.000 da SGAE). Tras oito horas, votacións e escrutinio, os elixidos foron exactamente os mesmos que a comisión reitora propuxera. Podedes ver todos os nomeamentos aquí.

Do mesmo xeito, proximamente abrirase na páxina web da SGAE un foro de participación (www.fororeformaelectoralsgae.es) para que todos os socios -con e sen voto- trasladen as opinións, comentarios e ideas que consideren oportunos para o seu estudo pola Comisión, que terá competencia plena e executiva.

O resultado dos traballos desta Comisión, na que se integraron os distintos grupos profesionais, territorios e sensibilidades autorales, volverase a someter á consideración dos socios nunha nova Asemblea Xeral Extraordinaria convocada en Madrid o día 25 de novembro, que deberá referendar a reforma estatutaria. Grazas a estes cambios, as eleccións xerais previstas para o día 16 de xaneiro de 2012 levarían a cabo coas novas normas aprobadas pola Asemblea Xeral de Socios.

Máis info:

SGAE

El País

A Unión Europea modificou a directiva 2006/116/CE, estendendo a vixencia dos dereitos de autor de 50 a 70 anos en gravacións musicais. Xustificouse en que “os artistas en xeral comezan as súas carreiras novas e o prazo actual de protección de 50 anos a miúdo non protexe as súas actuacións durante toda a súa vida”. A modificación aprobouse co voto en contra da República Checa, Bélxica, Holanda, Romanía, Eslovaquia, Suecia e Luxemburgo, e as abstencións de Austria e Estonia. España apoiou a medida.

A nova completa en Hispasonic e El País.

O prazo de inscrición para as redes subvencionadas por AGADIC xa está aberto (dende o 15 de setembro ata o 10 de outubro).

O regulamento para esta convocatoria é igual que a do pasado ano, sendo necesario conseguir  un mínimo de dous concertos por grupo e semestre, sen poder repetir concerto na mesma sala durante todo un ano.

En canto ao procedemento de facturación tamén segue do mesmo xeito. Recordade que Músicos ao Vivo pon á disposición de quen o precise o servizo de facturación a través das cooperativas de Musicat para solucionar este tema.

Por último, recordar que os grupos de música teñen cabida, ademáis da Rede Galega de Música ao Vivo, na Rede Galega de Salas.

Tedes toda a información e inscricións na web de Galescena.

A Consellaría de Cultura presentaba esta mañá a última xeira do ciclo Galicia Importa, que achegará ata o noso país ao longo do vindeiro outono, cinco concertos. Patrick Wolf (13 de outubro en Vigo), Bonnie ‘Prince’ Billy (22 de outubro na Coruña), Adam Cohen (27 de outubro en Compostela), Aloe Blacc (6 de novembro en Compostela) e Bettye Lavette (8 de novembro na Coruña) son as incorporacións confirmadas no programa. O titular de Cultura, Roberto Varela, sinalou no entanto que haberá máis actuacións antes de que acabe o ano.

Nova vista en MEGA

Máis info aquí.

O Consello de AIE traballou para conseguir un novo servizo para os Socios de AIE, que consiste na posibilidade de contratar un Multiseguro para Instrumentos Musicais coa aseguradora Zúrich, nunhas condicións moi vantaxosas con respecto aos prezos de mercado. Este seguro, exclusivo para os Socios de AIE, está deseñado para dar cobertura aos Instrumentos Musicais e aos Equipos de Son e Electrónicos.
Os instrumentos quedan asegurados durante a súa estancia e/ou transporte en calquera lugar ou situación, dentro do Territorio Nacional aínda que non interveñan en ensaios, xiras ou concertos. Mediante a oportuna notificación, previa ao comezo da viaxe, as coberturas poderán facerse extensivas a outros países, mediante a correspondente sobreprima.
Os obxectos asegurados poderán ser transportados por calquera dos seguintes medios: vehículos a motor, ferrocarril, avión e buque.

Máis info aquí.