Donicelas

O grupo Donicelas comeza sendo unha actividade escolar como tantas outras no C.P.I. Altamira de Salceda de Caselas, na que o grupo dos xoves monopolizado polo xénero feminino mostra interese pola tradición musical galega.

Así comeza unha andaina polos distintos pobos de Galicia e norte de Portugal tentando dar a coñecer a súa particular perspectiva da música galega. Esta viaxe leva ás Donicelas en varias ocasións aos estudios de RTVE e RTVG, participando en programas como “Lume na palleira”, “Alalá”, “Luar”, “A Revista”… Cabe salientar a súa participación no “Festival Folk de Callobre” (A Estrada), no “Pub Miudiño” (Ourense) e “Festas de San Froilán” (Lugo) entre outros.

No estudio de gravación, Donicelas participaron no traballo de Treixadura “Obrigado” en 1996, e tamén colaboran, no ano 1999, na gravación de “Feitizo”, do grupo Na Lúa. No ano 2005, despois de moitos anos de traballo e entrega á música, cumpren o ansiado sono da publicación do seu propio disco “Que nunca foi abalada”, no que contan con numerosas colaboracións de grandes músicos amigos (Treixadura, Orfeón Treixadura, Tino Baz).

No ano 2012, Donicelas cumpren 20 anos de andadura e celébranno o día 15 de setembro dese mesmo ano cun concerto no que se atopan rodeadas de amigos que estiveron acompañando ao grupo ao longo de todos estes anos. Tamén modifican a súa estética, grazas ao traballo da deseñadora e veciña de Salceda de Caselas, Noe Nogueiras. O novo vestiario apórtalles unha imaxe renovada, sen perder a esencia do tradicional. Este 20 aniversario será un punto de inflexión no grupo, xa que despois non deixarán de producirse cambios no grupo.

Donicelas, con máis de 20 anos de traxectoria musical, foise modificando e enriquecendo ao longo do tempo: Donicelas tivo o pracer de contar nalgún tempo con músicos e voces como Tania Pérez, Sito Alonso, Tere Pérez, Martín González, Isa Troncoso, e Olaia Rodríguez.

Actualmente Noelia Martínez e Bea Pérez son os membros fundadores que permanecen na formación, e xunto con Andrea Rodríguez, Rosa González, Víctor González e Xesús Díaz forman Donicelas.

Co esforzo de todos os seus compoñentes, o pasado decembro de 2015, sacan ao mercado o seu segundo traballo discográfico, “Donicelas”, composto de nove temas tradicionais e de autor, con arranxos propios. Neste traballo contan coa colaboración de artistas amigos como Xulio Lorenzo, Uxía Senlle, Paulo Nogueira, Miriam González ou Isaac Millán, quen tamén estivo nos mandos do estudo de gravación. Ademáis, tamén convidaron a antig@s “donicel@s” (X.M. López Sanromán, Isa Troncoso, Tere Pérez e Olaia Rodríguez) que quixeron deixar a súa pegada neste traballo.

Músicos